2015-imi aningaasaqarneq 1,7 pct.-imik pitsanngoriarpoq
2015-imi Kalaallit Nunaata aningaasaqarnera 1,7 pct.-imik pitsanngoriarpoq. Taamaasilluni ukiut marluk tulleriit aningaasaqarnerup ajorseriatarsimanera 2015-imi unippoq. Ukiuni 2004-miit 2008-mut aningaasaqarnerup ingerlalluarfiani ukiumut agguaqatigiissillugu 4,2 pct.-inik pitsanngoriarfiusarsimavoq. Ukiuni tulliuttuni sisamani BNP ukiumut agguaqatigiissillugu 1,8 pct.-inik qaffariartarsimavoq. 2013-imi -3,0 pct.-inik aamma 2014-imi -0,8 pct.-inik aningaasaqarneq ajorseriarsimavoq.
Titartagaq 1.1. Tunisassiornerup nalinga (BNP), akit qaffakkiartornerat peereerlugu
Malugiuk: 2006-2013-imi kisitsisit inaarutaasuupput, 2014-2015-imili kisitsigallarnerullutik.
Najoqqutaq: Naatsorsueqqissaartarfik, http://bank.stat.gl/nrn10
Nuna tamakkerlugu naatsorsuutini ingerlatsiviit atorfeqarfiillu branchenut pingaarnernut 32-nut agguataagaapput. Tunisassiornerup tamakkiisup taakkununnga branchenut agguataarnerata pisinnaalersippaa inuussutissarsiutit sannaanik misissueqqissaarsinnaalerneq. Branchet 32-usut paasiuminarsarnerisigut ikinnerulersillugit titartakkami 1.2-mi saqqummiunneqarput.
Inuussutissarsiorfik Pisortat inuinnaallu kiffartuussinerat inuussutissarsiutini annerpaatut inissisimavoq, inuiaqatigiinnilu tunisassiornerup tamakkiisup 33 pct.-ianik pilersitsiffiulluni. Inuussutissarsiutip imarivai pisortat kiffartuussinerat allaffissornikkut, peqqinnissaqarfeqarnikkut, ilinniartitaanermik ingerlatsinikkut il. il. Assartuineq, post aamma tele tunisassiornerup tamakkiisup iluani 17 pct.-imik pilersitsiffiuvoq. Aalisarneq, piniarneq aammalu Industri katillutik tunisassiornerup 14 pct.-ia pilersippaat. Tassani malugineqassaaq fabrikkit aalisakkanik qalerualinnillu suliarinnittartut Industrimi ilaatinneqarmata.
Titartagaq 1.2. Inuussutissarsiutit naleqarnerulersitsinerisa agguataarnera 2015, akiusimasunit kisitat (2010-mi akit)
Najoqqutaq: Naatsorsueqqissaartarfik, http://bank.stat.gl/nrn04
Titartakkami 1.3-mi takuneqarsinnaavoq naleqarnerulersitsisarnermik pilersitsisarneq qanoq inuussutissarsiutinut agguataartarnersoq. Tunisassiorneq (tungujortut), kiffartuussiviit (qorsuit) taavalu pisortat inuinnaallu kiffartuussinerat (qasertoq).
Titartagaq 1.3. Naleqarnerulersitsinerup ineriartornera, akiusimasunit kisitat (2010-mi akit)
Malugiuk: 2006-2013-imi kisitsisit inaarutaasuupput, 2014-2015-imili kisitsigallarnerullutik.
Najoqqutaq: Naatsorsueqqissaartarfik, http://bank.stat.gl/nrn04